財主佬印刷廠陸老闆早些時候分別完成了美國、加拿大、澳洲之地的探路工作，終於決定選擇移民美國。

他想在三藩市、洛杉磯、紐約、芝加哥等大城市開齋鋪連鎖店，所以近日時常約我到港九各區的齋菜館吃午飯和晚飯，希望找出些心得來。

陸老闆知道我研究密宗黑教，而且曾請益過林雲大師，所以他想托我找林雲大師做生招牌，為他的齋菜館做宣傳工作。

陸老闆也向我借了兩三本密宗書來看，他一看之下，才驚醒過來：「嘩，乜咁犀利，寫密宗書嘅人唔係美國大學教授，就係日本大學教授，個個都係博士，有頭有面，初時我仲以為江湖佬寫添！」

我唯有用最簡單的說話告知陸老闆一些事實：「佛教分顯宗和密宗兩大類，密宗又分黃教、紅教、白教、黑教等，依家黑教反而喺美國、日本好盛行，林雲係黑教大師，又係史丹福大學教授，所以信奉黑教嘅人，也自然以知識份子居多，都唔知幾多博士、醫生、律師、專業人士懇求林大師賜福。」

「我想請林大師幫我間齋鋪改個名，仲想請佢寫埋個招牌，你幫我同佢講吓。佢肯應承，我實會送番封大利是俾佢。」陸老闆以為自己必定開得成那幾間齋鋪。

「如果林大師肯應承幫你寫招牌，佢實唔會收你錢，你俾個空紅包佢就得啦。」密宗黑教不涉金錢，林雲也一直遵行這個規律。

那天早上，陸老闆要見美國領事，他怕英語說不上，所以要我陪他去。我們在希爾頓酒店見了面。

陸老闆從大陸來香港十八年，當年走路過羅湖橋時口袋裡只有兩元港幣，首先開始在一間植字公司做植字員，我那時在學校辦校報，跟他認識，由於他是印尼華僑知識份子，當年為了投身祖國而回歸大陸，那時我是罕有一個有興趣聽他說自己經驗的人，所以他把我當做知心朋友，到現在他是家財千萬的印刷廠老闆，仍然很熱心的對待我。

陸老闆事前已花過錢請律師替他準備一切見領事的必需資料，滿以為萬事妥當，怎知道去到領事館門口，才知道大事不妙，原來全世界人，不分男女老幼尊卑貴賤，全部要在門外排隊。

陸老闆曾經在大陸捱過合作農場，忍受過人間鹹苦，但他畢竟在香港已發達了十年，享受慣了富豪級的招呼。他處身在熙來攘往的公眾環境裡，站在人龍尾端十五分鐘之後，終於忍不住氣發起嘮囌。「有冇搞錯呀，美國佬叫人企喺門口外便等，仲慘過舊陣時喺灣仔貝夫人診所門口輪街症，輪街症都仲有張櫈坐，而家我地去美國又唔係乞，而係擺好多錢去美國製造就業機會，救濟吓啲美國人，我地而家竟然要企喺度慢慢等，真係谷住度氣。」如果不是前面也有一位穿露背裝的女模特兒模樣女仕在排隊，陸老闆必定大爆粗口。

「美國佬驚人放炸彈，所以所有人都要喺門口外面排隊。」我解釋說。

「美國佬條命值錢啲呀？我地就苦命要排隊！真係吹乜漲，好，美國佬牙擦沙塵，我就唔俾錢佢洗，我要移民加拿大。」陸老闆說得興起，拉着我走。「我地去加拿大領事館同領事飲咖啡。」

大凡去過交易廣場加拿大領事館的人都曉得，領事館分兩層，下層辦普通簽證，上層則是只限投資移民，那裡地方寬敞，沙發夠大，環境舒服，領事笑容滿面，親自出來招呼，而說話滔滔不絕，十足十是保險公司的經紀，可以說。幾乎任何想到加拿大投資的人，見過這位領事之後，都不會中途變卦，而且可能把投資數目加大。陸老闆以前也見過加拿大領事，親領過他的熱情招待，所以今次陸老闆回頭投向加拿大，那位超級推銷員領事必定不會讓這塊肥肉再溜走。

在加拿大可以投資開齋鋪的城市只有溫哥華和多倫多，陸老闆要動用的資金少得多。而加拿大的移民監也不像美國那樣長，所以陸老闆必定不會放棄香港這個根據地。

在步行往交易廣場的途中，我跟陸老闆講：「陸叔，我現在跟幾個朋友搞咗個基金，你有冇興趣參加一份。」

「基金？乜你想做基佬呀！」

「打工打咗十幾年，都冇乜出息，咪諗吓做基佬，搏一搏咯！」

「有邊幾個夾份呀！」

「有哲學家OK華、詩人小念、存在主義者天成、馬克思學徒百強，我地每人夾二十萬，而家都有一百萬，我地尋日抽簽，我抽到頭兩個月由我話事。」

「你嗰幾個朋友我唔係幾熟，不過我識咗你十八年，你今日先至第一次開聲問我同你做生意，我實唔會托手踭；我搵錢完全唔係靠股票，我對個啲嘢完全冇信心，不過我信晒你……」

「如果你對股票有興趣，不如就算。」我搶先打斷他的話。

「咪講呢啲嘢。我打本一百萬，夠未丫？」

「我都唔諗住你攞咁多，如果你真係鬆力，有多一百萬調動就仲好。」

「你諗住買啲乜嘢呀？」

「乜都有，五份一買藍籌股，五份一買二三線投。好似十字軍、麗新、鷹君、開達、澳月電力……另外五份一存外幣、五份一買老虎基金同埋獲多利嘅亞洲基金，再剩落嚟嗰五份一，就係攞嚟搏殺，炒金同埋買期指。」

「你講乜嘢我都唔知，你估計，今年十二月三十一日我地會賺幾多？」

「保守估計，到年尾香港整體表現會增長百份之十二，我地一定會跑贏大市，如果順利，應該會賺百份之十八至二十二。」

「咁會唔會輸★！？」

「我地有賞罰制度，決策者要承責任，贏者有花紅，輸者要扣分，我地每星期會有一次檢討，而半個月會有一次策略研究。」

「開會你唔好預我，總之你要錢就開聲。」

有這樣的Silent Partne，真是最好不過，而且他真的大把錢。日後就算真的輸了也不會「拜神唔見雞」。有陸老闆做我後台，我做基佬的信心也便大增了。

不知不覺間已來到交易廣場，看到門前放着的朱銘巨型銅塑「太極」，那個屈腿沉身而雙手正準備向外推出的造型，確實令我想到自身處境，以及給我重要的啟示。人不要急於把雙手向外推出，之前先要沉身做好紮馬步的動作。

#####

[ #1987 #張氏起居注 ]