鄭文雅寫真集賣港幣一百元。我有一本。

鄧小平寫真集賣美金一百元。我也有一本。

鄭小姐寫真集出版當日，我參加了在麗晶舉行的慶祝酒會，會上，鄭小姐十分與奮，高興到流出眼淚來，我趁她開心時候，走到她面前，像小影迷般請求她簽名，她笑到合不攏咀，龍飛鳳舞地在書頁上題字，我細看，見是「請賞光」，分明有心整蠱我。

鄧小平寫真集出版當日，也有慶祝酒會舉行，也在麗晶，我以為鄧小平也會出席，所以出門前特別梳洗一番，穿上了衣櫃裡唯一的一件白恤衫，結上了一位朋友從莫斯科友誼商店買回來的領帶，預備在酒會上請鄧先生在寫真集上簽名。

去到會場，見很多新華社要員從多架黑色大房車上鑽出來，心裡面暗想沒白費整裝的心機了，因為會場確是很隆重。

許家屯現身時候，大批記者和要人把他包圍，我想走過去擦鞋也全沒機會。當大家走近許先生時，他竟然揚起右手，大聲叫住各人勿走近他身邊：「不要碰我。」

許先生出示掌心，大家一看，幾乎嚇了一跳，原來都長出了水痘般的腫泡。「會傳染呀！」許先生警告正要接近他的人。

後來新華社一位要員解釋，許社長是抱病在身，他患了「肩周炎」，右手由肩部起有腫脹現象，要用按摩方法來治療。

許先生早前訪廣西染得此病，因為他走訪地方太多，舟車勞頓，休息不夠，疲勞過度，抵抗力減弱，所以細菌有機入侵。他說回到香港已睡床兩天，這兩天都有打針和吃藥。

我以為鄧小平會出席酒會，但久久都不見他蹤影，負責發行的阿爾拔，見我頹喪表情，過來安慰我，「鄧小平主席而家喺北京人民大會堂出席緊一個性質完全相同的酒會，我怕你失望，所以特別利用人造衛星將嗰邊慨情況直接轉播嚟香港，等一陣間許社長會替我哋按鈕，北京嗰度嘅情形就會即時傳過來。」

許先生用左手按鈕，衛星轉播便開始，我對北京領導人十分陌生，不過有位行家在身旁逐一為我介紹，「嗰個係胡啟立，呢個係薄一波，嗰個係宋平、秦基偉、丁關根、宋任窮、芮杏文。嗱，呢兩個你就實識，鄧樸方同鄧琳，做司儀嗰個係楊尚昆個仔楊紹明。」

衛星轉播有廿多分鐘時間，不過看來看去都未見鄧小平出席，旁邊的中國通說：「鄧主任去咗大亞灣巡視，所以唔得閒出席。」

這時，查理斯在旁邊經過，我一手捉住他。「我上嚟係為咗搵鄧主席簽名喎，而家冇簽名點樣先？」

「我幫你搞掂佢，」查理斯說：「我同你將本書寄去北京，請鄧主席幫你簽名。」

「咁樣唔該晒先，」我說：「食飯咯，有冇約人呀，一齊食開年飯啦。」我叫了偉哥和民仔等一起去。

從麗晶走出來。夜幕已低垂，在南苑坐下來，有人過來招呼我們。我見了他幾乎嚇了一跳，他長得高大，有些少肥胖；皮膚很白，帶了金絲眼鏡，頭髮貼服，襯衫很白，結了bow呔，十足富家子弟款，怎麼會有老細出來招呼客人呢？我趁珍姐走過時拉住她問。「妳點會請到個伙記成個老細款呀！我都唔敢叫佢開茶。」

「而家競爭咁大，唔請番啲夠照嘅人做樓面點壓得住陣腳呀！你睇吓中國城門口嗰啲小姐幾省鏡。要有啲生招牌喺度先得呀！」珍姐向我解釋酒樓經營之道。

「同我寫幾個菜，有乜好嘢食呀？」我問。

「寫個橫財就手啦，之後嚟個老少平安，再食個如意吉祥、龍馬精神，飲唔飲湯呀！不如要個年年有餘啦。」

珍姐講了一大堆餸菜名堂，我們也不知道會吃些甚麼，但我們都相信她好介紹。

然後，我們五個人分別輪流講自己的新春發財經過。查理斯先說他在東京每日賺四百美元。「我年初四喺東京搭西北飛機返香港。機位over-booked，航空公司宣佈如果有人肯放棄機位，會得四百美元補償，並有食宿招待。我即時收到支票。年初五嗰日，機位又over-booked，我又放棄，又收多一張四百美元支票。年初六，機位同樣over-booked，我又放棄，再多一張支票落袋。到年初七，我收支票收到唔好音思，請他們安排我飛去馬尼拉，才轉返香港，他們求之不得，馬上替我搞掂食宿及一切費用。香港每年都有好多人新春旅行返嚟，即向消委會投訴。我對自己人才講，我免費多住東京三晚、馬尼拉一晚，仲有美金一千二百蚊嘅津貼。」查理斯的經歷，值得存檔，但凡個體戶宜注意。

偉哥在新春時候走去做tour escort，帶隊去泰國四天。「去到酒店，派完鎖匙，我宣布晚飯集合時間之後便上房，之後，第一個跳落泳池嘅係我。我自己仲係團裡面第一個玩降落傘嘅人。

「我做領隊住Royal Cliff單人房，去disco、沖涼全部唔駛計，仲有成三千蚊港幣執到。咁樣過年都幾疏乎，下次我想搵多個escort俾我女朋友做，咁樣我地又可渡蜜月又可賺錢。」

民仔最近失戀，今年竟然跑到廣州過春節。「我去到深圳，搭車上廣州，點知後嚟買唔到飛番落嚟香港，我唯有轉去澳門，喺澳門冇嘢做，走入賭場，拉老虎機，竟然俾我拉到萬幾銀。」

我不賭博，就算在新年時候也不例外，今年年初三，我去探訪新搬去康怡花園C座居住的蝦仔，去到那裡，一班熟朋友在座，蝦仔家裡有一架karaoke，我們唱起歌來，吃過中午飯後，蝦仔帶我們上山行郊野公園。上到山頂，蝦仔扭開收音機，他原來要聽馬，我十分不滿蝦仔破壞郊野公園寧靜環境，於是對他說：「今日你買咗幾多，輸咗當我嘅，贏咗分一半俾我，你唔好開收音機。」

蝦仔也不想我們幾個城市人行郊野公園掃興，勉強答應我要求。當晚從山上回到家，我收到蝦仔電話，知道他贏錢，除了本，我可分到二千多元。

今年一開始大家都無意中發財。偉哥：「今年我地一定會好掂！」

蝦仔附和：「係，一於咁話。」

民仔又起哄：「大家飲杯。」

我平常不飲酒，但當晚。我試飲了一杯中國啤酒。覺得有點頭暈暈，偉哥請我到他家裡看《太陽帝國》鐳射影碟，去到他家裡，我已倒在梳化上，竟然一宿無話。轉眼已是天明。

#####

[ #1988 #張氏起居注 ]